ل سەر بنەمایێ فەرمانا دەرچووی ژ لایێ سەرۆکاتییا ئەنجومەنێ وەزیرێن هەرێما کوردستانێ ل ڕێکەفتی (2021/7/28)، زاخۆ وەک ئیدارەکا سەربەخۆ هاتە ڕاگەیاندن. لدویف ئەڤی بڕیارێ، پێکهاتێ کارگێڕی گۆڕانکارییەکا جۆری بخۆڤە دیت و ژ ئێک قەزا بووە دو قەزایێن کارگێڕی، کو ئەوژی: قەزا زاخۆ و قەزا باتیفا.

قەزا زاخۆ هەردوو ناحیێن (ڕزگاری و دەرکارێ) بخۆڤە دگرێت، د دەمەکێ دا قەزا باتیفا ناحیا (بێگۆڤا) بخۆڤە دگرێت، زێدەباری ناحیا (باتیفا) ئەوا کو هاتییە بلندکرن بۆ پلەیا قەزا پشتی کو ناحیە بووی. هەروەسا گۆڕانکارییا کارگێڕی بەرفرەهبوونا سنوورێ جوگرافی بخۆڤە گرت ب ڕێیا ئینانا ناحیا (باتێلێ) بۆ سەر قەزا زاخۆ پشتی کو ژ قەزا سێمێلێ هاتییە جوداکرن.

زێدەباری ئەڤێ چەندێ، ل ڕێکەفتی 2025/11/6 و ب بڕیارا حکومەتا هەرێما کوردستانێ (ئەنجومەنێ وەزیران / وەزارەتا ناڤخۆ)، ناحیا ئافکانی(ئاڤگەنی) هاتە دروستکرن دا کو ژ لایێ کارگێڕی ڤە سەر ب قەزا باتیفا ڤە بیت.

ب ئەڤی شێوەی پێکهاتێ کارگێڕی یێ ئیدارا سەربەخۆ یا زاخۆ تەمام بوو، کو ژ دو قەزایان پێکدهێت: قەزا زاخۆ و قەزا باتیفا. سەر ب قەزا زاخۆ ڤە هەر ئێک ژ ناحیێن (دەرکار، ڕزگاری، و باتێل) هەنە، د دەمەکێ دا سەر ب قەزا باتیفا ڤە هەردوو ناحیێن (بێگۆڤا و ئافکانی(ئاڤگەنی)) هەنە. وەک د نەخشەیێ خوارێ دا دیارە: